‘Middelman’ deur Rudolph Willemse
middelman rudolph willemse.jpg

Middelman is Rudolph Willemse se tweede bundel, wat sowat twintig jaar ná sy debuut verskyn het, in 2005. Soos die titel aandui, is die oorheersende tema die man in die middel, wat beide kante toe moet kan kommunikeer, bemiddel en intree. Hierdie man is ook in die middel van ander dinge, soos van middeljarige leeftyd, in die middel van die maatskappy sonder illusies om die boonste sport te bereik, met ander woorde die gewone man, wat ten spyte van alles nie sy individualiteit prysgee nie. Teen hierdie agtergrond word in sewe afdelings gebeure in die voorafgaande dekades en die huidige behandel, waar aktuele gebeure afgewissel word met die alledaagse, dikwels begelei deur verwysings na popmusiektreffers wat aanduidend is van ’n veranderende wêreld.

 

weltevredenpark

i

ek is bang vir die das

wat netjies pas

ek is bang vir my

rooi rooi aktetas

 

ii

kind hou up skree

jou pa het jou lief

maar got hou op skree

 

iii

ek ry werk toe in ’n dubbeldekkerbus

die bus krap teen takke

daar is geen salf te smeer

aan ’n dubbeldekkerbus

 

straatkafee melville

 

ek eet ontbyt verwyl die tyd

’n draadkunstenaar verkoop ’n draadloos, ’n aardbol

’n mercedes uit die vyftigerjare met ’n afslaankap

fuif verby. jong meisies

met kaal middellyfies giggel

en wuif. dit gaan vir ’n goeie doel - die voortbestaan van die spesie

’n joernalis voer ’n onderhoud met ’n musikant

aan my totaal onbekend, met ’n oorbel in sy oor

en ’n serious outlook on life

 

vanaand sou ek jou wou bel

hoor hoe dit met jou gaan

vra hoe jou dag was &

hoe alles afgeloop het

jou vertel van die hoep hoep

in my tuin   van die nuwe

tony cox steve newman cd

ek lees nou saul bellow

se hertzog wat ’n boek

ja dit het lekker gereën &

ek en die kinders het krieket gespeel

onder die wilgers

kitaar gespeel skaak gespeel

kos gekoop by woolies &

die bliksemse kar lek olie

mense bel my & praat oor dinge

wat nie meer saak maak nie

werk landsake onvervulde ambisies

die ontwikkelende middelklas

nuwe moontlikhede nuwe motors

nuwe mentors van die siel

met niks nuut te sê nie

ek sou jou graag wou bel en vertel

van die piet-my-vrou van fairland

wat saans roep in die donker &

hoe stil dit nou hier is

hoe stil dit nou hier is

hoe graag ek by jou wil wees

dat ek vir jou lief is

dat ek vir jou wag &

dat die lewe onsettend onsettend

kort is

 

Uittreksels van Middelman, Toga-uitgewers. Kopiereg voorbehou.

redakteur@klyntji.com