Argitek en kunstenaar Anton Barnard se tekeninge
En Draadhond se musiek: waar vorm en klank uit Suid-Afrika, Duitsland ontmoet
Dat Anton Barnard ’n fyn aanvoeling het vir die wêreld se vorms is veral opmerkbaar in sy tekeninge. Dié Suid-Afrikaner werk as ’n argitek in Duitsland, maar hy beoefen ook skilderkuns, en is ’n illustreerder en lid van die Afrikaanse rock band Draadhond. Verder het hy ook ’n belangstelling in meubelontwerp, meubelbou, grafiese ontwerp en cartoons. Sy sketse word dikwels deur musiek geïnspireer, dié dat onderskeie albumname die onderskrifte vir verskeie van sy illustrasies is. Die verwysings na musikante wissel van Radiohead en Slayer tot The Buckfever Underground, Johnny Clegg, Piet Botha en Kobus!. Sy sketse getuig van ’n Suid-Afrikaanse agtergrond, verbind met ’n diepgaande kennismaking met die Europese landskap. Dit is punk daarby.
Anton Barnard is gebore op Stellenbosch in 1972 en hy het gematrikuleer aan Hugenote Hoërskool in 1990. Daarna het hy sy graad verwerf in argitektuur aan die voormalige Universiteit van Port Elizabeth, nou Nelson Mandela-Universiteit. Hy het ook die Afrikaanse rock band Plan B gestig as liedjieskrywer en sanger, saam met SC Pienaar op elektriese kitaar in 1996, ook in PE. Na afloop van sy studies het hy in 1998 begin skilder in akriel, later olie. Gedurende hierdie tydperk het Barnard verhuis na Kaapstad en gewerk as argitek. Sy kuns is op verskeie plekke uitgestal en hy is bekroon as argitek. Sy band Plan B het in 2005 die album Nalatenskap van die Gras opgeneem. Kort daarna het Barnard vertrek na Dublin en Munich, waar hy gewoon en gewerk het. Sedert 2014 is hy woonagtig in die Sigmaringen-omgewing, Baden-Württemberg in Duitsland en neem hy deel aan verskillende solo- en groep-uitstallings in die omgewing. Plan B se naam is ook intussen verander na Draadhond, steeds met Pienaar as een van die lede, en hulle album Was Jou Bek Uit Met Seep is in 2018 uitgereik. Dié album is vervaardig deur Jo Ellis in Ladismith in die Wes-Kaap. Draadhond het ook tydens die KKNK in Oudtshoorn in 2019 opgetree, en Barnard se sketsreeks Die Storie van Draadhond is in Ons Klyntji 2019 gepubliseer.
Eerste en oudste Afrikaanse tydskrif, sedert 1896
Divers, progressief en vars. Waardeer jy ’n stem soos Klyntji s’n? Het jy van Argitek en kunstenaar Anton Barnard se tekeninge gehou? Dan ondersteun ons. Donasies van lesers word gebruik om ons bedieningkostes te betaal: jou bydrae hou Klyntji aanlyn. Vriende van Klyntji word op hierdie bladsy erken. Elke bietjie help.
