Gucci en die Silbersteins

'n Unieke ontmoeting van letterkunde en modeontwerp.

Ons deel foto-uittreksels van literêre leefstyljoernaal Ambassadeur se 54-bladsy foto-essay, in samewerking met Gucci, in hulle tweede uitgawe. Dié modehuis se voor-herfs ’18 versameling – wat spesiaal van Italië af ingevlieg is vir die foto’s – word aangebied saam met bypassende aanhalings uit Etienne Leroux se veelbesproke roman Sewe Dae by die Silbersteins wat as inspirasie vir die modestorie gedien het. Dit is ’n unieke ontmoeting van Afrikaanse letterkunde en globale modeontwerp.

Anna-Bet Stemmet het vir Ambassadeur II ’n voorwoord geskryf oor die Bellingham-wynlandgoed wat as inspirasie gedien het vir Leroux se roman. Die herehuis daar is versier met ’n eksentrieke mengsel van Eurosentriese en Oosterse style: eiers gemaak van halfedelstene, tot versamelings Venesiese glas en antieke meubels uit Frankryk, Rusland, Portugal en Italië. Daar is selfs ’n vergulde hemelbed in een van die gastekamers wat oorspronklik ’n trougeskenk was aan die koning en koningin van Soematra.

Met die eerste publikasie van Sewe dae by die Silbersteins, in 1962, is dit beskou as revolusionêr – ’n deurbraak in die Suid-Afrikaanse letterkunde. Die roman speel af op die fiktiewe Welgevonden-wynlandgoed waarheen die hoofkarakter, Henry van Eeden, gestuur word om vir ’n week te bly sodat hy sy verloofde, Salome Silberstein, vir die eerste keer kan ontmoet. In die loop van die sewe dae eskaleer die roman in die duisterheid, soos Henry in die weë van die rykes opgevoed word. Elke aand woon hy ’n reeks buitensporige, bisarre partytjies by - ’n uitbundige fees van oorvloed wat grens aan die makaber. Die roman eindig op die sewende dag wanneer Henry se bruid, wat hy nog nie deur die loop van die week kon ontmoet nie, hom op hul troudag by die kansel tegemoetkom.

Fotografie en konsep deur Derick Muller
Klere deur Gucci

Kreatiewe vervaardiger: Karin Muller
Stilis: Esperance Potgieter
Produksiebestuurder: Jacques Erasmus
Plek van fotosessie: Bellingham-herehuis
Fotografie-assistent: Kleinjan Groenewald
Kameraman: Tom Purcell
Assistent-kameraman: Rudi Gremels
Hoofbeligter: Mark van Zyl
Grimering & hare: Danielle Jacobs, Monique du Toit, Nicola Loots
Modelle: Gina May Gilpin (Ice Models), Jamille Morales (D&A Model Management), Kayla Hansen (Boss Models), Pierre Rossouw (Boss Models)

---

Ambassadeur II is beskikbaar by jou naaste Exclusive Books-boekwinkel, asook aanlyn.