Kay Faith oor Kaapse hip-hop

Kay Faith oor Kaapse hip-hop
Foto:  Luke Evans

Die meisie agter Youngsta en ander rappers se sound

Kay Faith is gebore as Karien Barnard, iets wat die talle blogs en ander publikasies waarop sy al verskyn het graag meld. Verdere basiese agtergrond is dat sy in Knysna gebore is, van kleins af blootgestel was aan ’n wye reeks musiek buite die konvensionele radiotreffers, en dat sy aanvanklik aansoek gedoen het om kuns by Michaelis te gaan swot. Ná haar aansoek in die pos verlore geraak het, het sy by die Cape Audio College opgeëindig om klankontwerp te studeer. Dit het vinnig tot haar deurgedring dat sy daarvan hou om songs te maak, dat sy ’n klomp verskillende klankgrepe bymekaar kon sit en iets nuuts vorm – sy was boonop goed hiermee. Haar talent is vinnig raakgesien en dit was nie lank tot Kaapse rappers in haar DM’s begin slide het nie. Buiten haar werk as hip-hop engineer, maak sy ook haar eie musiek. Haar debuutalbum In Good Faith is in 2017 uitgereik.

Kay word geken in die plaaslike hip-hop bedryf, veral in die Kaapstadse scene waar sy meestal werksaam is. Een van haar mees onlangse collabs was met die engineering van YoungstaCPT se debuutalbum 3T. Dis geen klein ding nie, met die dat Youngsta nogals groot is. Kay verskyn ook op twee van die album se songs, The Cape of Good Hope en KAAPSTAD NAAIER. Sy is mede-producer van die album se roerende openingstuk Pavement Special en was vir die hele album se engineering verantwoordelik. Klyntji het met haar in gesprek getree oor haar werk, uitkyke, musieksmaak en meer.


Jy is oorspronklik van Knysna. Hoe het jy in Kaapstad se hip-hop scene opgeëindig?

Foto:  Luke Evans

Nadat ek klankingenieurswese geswot het, het ek ’n hele paar internships gedoen. Een van my internships was by Cape Audio College waar ek die geleentheid gekry het om in studio te wees saam met die legendariese Mos Def. Ons het twee sessies saam gehad en dit het soortvan die begin van dinge vir my in die hip-hop scene beteken. Die word on the street het begin en baie Kaapse kunstenaars het in kontak met my getree. Dit was dit.

My ouer broer het altyd baie musiek in ons kar gespeel toe ek klein was. Een van die genres waaraan ek van kleins af baie aan blootgestel is, is hip-hop. My belangstelling in dié genre kom dus heel natuurlik.

Wat behels jou werk as sound engineer, veral vir Youngsta saam met wie jy al ’n hele ruk werk?

Ek doen al die opnames, editing, produksies, die mixing van die klank en ook die mastering-proses. My verantwoordelikheid is om in elke aspek die beste kwaliteit klank en gevoel te deliver, en ook om seker te maak dat die musiek so authentic as moontlik klink. It needs to be clean and loud.

Jy produce ook jou eie musiek onder die naam Kay Faith. Hoe vind jy ’n balans tussen jou eie en ander mense se klank?

Ek luister skaars na musiek wat gewild is. Ek word baie aan musiek blootgestel wat nog nie aan die publiek vrygestel is nie. Só het ek altyd ’n insight van wat agter die skerms aangaan. Dit help my om te weet wat die volgende wave gaan wees in hip-hop. Dit help my ook om te weet wat baie trefkrag gaan hê, saam met ek wat aanhou bou aan my eie klank. Die kombinasie van die twee hou my in balans.

Wat is jou uitkyk op Youngsta se musiek wat dikwels praat oor sosiale kwessies wat Suid-Afrika, maar veral die Kaapse coloured community knou? Die blywende gevolge van kolonialisme, apartheid ens.

Sy boodskap is baie belangrik. Hy is ’n stem vir ’n kultuur wat gereeld misgekyk word. Suid-Afrika is erg gefokus op die kwessies tussen wit en swart, maar die stem en geskiedenis van kleurling-mense word nie goed genoeg verteenwoordig nie. Ek self het verskriklik baie geleer van die coloured kultuur in my werksverhouding met YoungstaCPT en die Y?Gen ouens.

Hip-hop en rap is huge regoor die wêreld, maar nie juis onder Afrikaners nie. Dink jy dit verander? Is Afrikaners clued up genoeg?

Afrikaanse rap is vir my een van die opwindendste soorte hip-hop omdat Afrikaans as ’n taal sterk uitdrukkings het. Afrikaanse musiek het wel baie cheesy geraak (nie alle soorte nie, maar die meeste van die mainstream Afrikaanse musiek wat deur massas verteer word). Baie van die ouer generasie Afrikaners sien rapmusiek as geraas of musiek vir skollies. Ek sien meer en meer jong Afrikaanse mense wat in hip-hop belangstel. Bygesê, local Afrikaanse rap is nie regtig waar dit moet wees nie. Dit is iets wat ek in die toekoms aan wil probeer werk want ek dink daar is talent, en met die regte produksie kan iets besonders gemaak word.

Foto:  Luke Evans

Watter ander local hip-hop artists en rappers staan vooraan met vars, uitdagende werk?

Dié een is vir my moeilik om te antwoord omdat daar so baie is. Plaaslik geniet ek Sipho the Gift, Dope Saint Jude, Phreshclique, Dee Koala, Uno July en Maglera Doe Boy.

Watter plaaslike hip-hop musiekvideo’s staan vir jou uit? Ek dink aan die trefkrag van Childish Gambino se This is America. Dit is moerse tydig en hard-hitting.

YoungstaCPT se YVR is daardie video vir my. Die video is visueel goed saamgestel en die storie is besonders. Die storie van die Hollanders se slawe is nie vertel gedurende die kolonialisme-tydperk in Suid Afrika nie. Dit word nou vertel.

Wie se musiek luister jy na in ander genres? Veral plaaslik.

Ek geniet Gqom baie. Daar is baie plaaslike talente soos Moonga K, Manu Grace en Diamond Thug. Ek stel hierdie kunstenaars voor as hip-hop nie jou ding is nie.

Watter projekte is jy mee besig? Enige exciting collabs in die pyplyn?

Ek werk op die oomblik aan my album Antithesis wat later in die jaar gaan uitkom.

Ek doen ook ’n baie opwindende remix project met die local band Diamond Thug wat binnekort sal uit wees. Buiten dit sal ek voorstel om my op sosiale media dop te hou. Ek voer altyd iets in die mou.

Foto:  Luke Evans

Redakteur van Klyntji, assistent-kurator van die Konstitutionele Hof se kunsversameling en tans besig met 'n LLM in mediareg. Instagram / redakteur@klyntji.com